ప్రేమ ఓ ప్రేమా

మనసులో మాట (1999)

రచన: సిరివెన్నెల

సంగీతం: ఎస్వీ కృష్ణారెడ్డి 

గానం: చిత్ర

పల్లవి : 

ప్రేమ ఓ ప్రేమా వచ్చావా ప్రేమా

అనుకుంటూనే ఉన్నా రామ్మా

ప్రేమా ఓ ప్రేమా తెచ్చావా ప్రేమా

కాదంటానా హయ్యో రామా

గుమ్మందాకా వచ్చి

ఇపుడాలోచిస్తావేమ్మా

గుండెల్లో కొలువుంచి

నిన్ను ఆరాతీస్తాలేమ్మా

ఇకపై నువ్వే నా చిరునామా

ప్రేమా ఓ ప్రేమ వచ్చావా ప్రేమా

అనుకుంటూనే ఉన్నా రామ్మా

ప్రేమా ఓ ప్రేమా తెచ్చావా ప్రేమా

కాదంటానా హయ్యో రామా

చరణం 1:

హృదయములో మృదులయలో

కదిలిన అలికిడి తెలియనిదా

నిద్దురలో మెలకువలో

అది నను నిమిషం విడిచినదా

ఎక్కడుందీ ఇంతకాలం

జాడలేని ఇంద్రజాలం

సరస స్వరాగ సురాగమదేదో

నరనరములా స్వరలహరులై

ప్రవహించిన ప్రియమధురిమా

ప్రేమా ఓ ప్రేమా వచ్చావా ప్రేమా

చరణం 2:

అడుగడుగూ తడబడగా

తరిమిన అలజడి నువ్వు కాదా

ఆణువణువూ తడిసేలా

తడిమిన తొలకరి నువ్వు కాదా

స్వాతి స్నేహం ఆలపించీ

చక్రవాకం ఆలకించి

మధనశరాలే ముత్యాలసరాలై

తొలివానగా చలివీణగా

చెలి లీలగా ఎద వాలెగా

ప్రేమా ఓ ప్రేమా వచ్చావా ప్రేమా