ఇవాళ (14.01.2022) జంధ్యాల గారి జయంతి సందర్భంగా:
హాస్యం అనగా వినోదం కలిగించి, నవ్వు
పుట్టించే లక్షణం కలిగిన ఒక భావానుభవం. హాస్యం అనేది ప్రతి ఒక్కరి జీవితంలోనూ
అలానే సినిమాల్లోనూ చాలా ప్రధానమైన రసం. సినిమాలో సాధారణంగా ఎన్ని రకాల రసాలు
పలికినా... హాస్యానికి మాత్రం ఒక ప్రత్యేకమయిన స్థానం ఉంది. రెండున్నర గంటల
సినిమాలో ఎన్ని ఎక్కువ దృశ్యాల్లో హాస్యం పరంగా ఎంటర్ టైన్ మెంటు ఉంటే అంత ఎక్కువ రిలీఫ్
ని పొందుతారు ప్రేక్షకులు. అందుకే ముఖ్యంగా చాలా తెలుగు సినిమాల్లో కథావస్తువు
ఏదయినా గానీ... చెప్పే మాధ్యమాన్ని హాస్యంగా ఉండేలా చూసుకుంటారు రచయిత, దర్శకుడు. పైగా హాస్య ప్రధానమైన సినిమాలకి తెలుగులో మినిమమ్ గ్యారంటీ
కలెక్షన్లు తప్పనిసరిగా వస్తాయి.
సినిమాల్లో మనం చూసే హాస్యం దర్శకుని అభిరుచి
మేరకు రకరకాల పద్ధతుల్లో సృష్టించబడుతుంది. కొందరు దర్శకులు దృశ్య ప్రధానమైన హాస్యం
ఇష్టపడితే, ఎక్కువమంది దర్శకులు సంభాషణల పరంగా కానీ నేపథ్య
సంగీతం మూలంగా హాస్యం వచ్చేలా చూసుకుంటారు. డైలాగులు లేకుండా దృశ్య ప్రధానమైన
హాస్యం చూపించడం అంత తేలిక కాదు కాబట్టి తెలుగులో సంభాషణల పరంగా ఉండే హాస్యమే
ఎక్కువ. ఈ రకపు హాస్యాన్ని మాటల రచయిత నుంచి, నటుల
దగ్గర్నుంచి రాబట్టుకోవడం తేలిక కూడాను.
అసలింతకీ తెలుగు చలనచిత్రాల్లో హాస్యం ఎన్ని రకాలుగా ఉంటుంది? (ఇక్కడ నేను గమనించిన దాదాపు ఏభై రకాల హాస్య ప్రక్రియలను ప్రస్తావించాను. వెదికితే ఇంకా ఉంటాయి.)