రాజ్యము బలము

చిత్రం: రాజాధిరాజు (1980)

సంగీతం: కె.వి.మహదేవన్

రచన: వేటూరి

గానం: పి.సుశీల

పల్లవి:

రాజ్యము బలము మహిమ నీవే నీవే

జవము జీవము జీవనమీవే నీవే

రాజ్యము బలము మహిమ నీవే నీవే

జవము జీవము జీవనమీవే నీవే

మరియ తనయ మధురహృదయ

మరియ తనయ మధురహృదయ

కరుణామయా! కరుణామయా!

రాజ్యము బలము

చరణం 1: 

అవసరానికి మించి ఐశ్వర్యమిస్తే

మనిషి కన్నూమిన్నూ కానబోడేమో

కడుపుకు చాలినంత కబళమీయకుంటే

మనిషి నీతి నియమం పాటించడేమో

మనిషి మనుగడకు సరిపడనిచ్చి

శాంతి ప్రేమ తృప్తినిచ్చి

మనిషి మనుగడకు సరిపడనిచ్చి

శాంతి ప్రేమ తృప్తినిచ్చి

గుండె గుండె నీ గుడిదీపాలై

అడుగు అడుగు నీ ఆలయమయ్యే

రాజ్యమీవయ్యా...

నీ రాజ్యమీవయ్యా

రాజ్యము బలము

చరణం 2: 

అర్హత లేనివారికి అధికారం ఇస్తే

దయ ధర్మం దారితప్పునేమో

దారితప్పినవారిని చేరదీయకుంటే

తిరిగి తిరిగి తిరగబడతారేమో

తగినవారికి తగు బలమిచ్చి

సహనం క్షమ సఖ్యతనిచ్చి

తగినవారికి తగు బలమిచ్చి

సహనం క్షమ సఖ్యతనిచ్చి

తనువు తనువు నిరీక్షణశాలై

అణువు అణువు నీ రక్షణకేనయ్యే

బలమీవయ్యా... 

ఆత్మబలమీవయ్యా

చరణం 3: 

శిలువపైన నీ రక్తం చిందిననాడే

శమదమాలు శోధించెనుగాదా

నీ పునరుత్థానంతో రక్షణ రాజిల్లి

శోకం మరణం మరణించెను గాదా

చావు పుటుక నీ శ్వాసలనీ

దయాదండన పరీక్షలనీ

చావు పుటుక నీ శ్వాసలనీ

దయాదండన పరీక్షలనీ

ఉనికి ఉనికి నీ వెలుగునీడలని

సత్యం మార్గం సర్వం నీవని

మహిమ తెలుపవయ్యా...

నీ మహిమ తెలుపవయ్యా

రాజ్యము బలము