చంద్రకాంతిలో

కథానాయికను తెలుగునేలమీద పారే నదులతో పోలుస్తూ అందంగా సాగే వేటూరి గారి సాహిత్యం రమేష్ నాయుడిగారి సంగీతం బాలు గారి స్వరం వెరసి ఈ పాటకు తేనెలాంటి కమ్మదనాన్ని అద్ది ఎన్నిసార్లు విన్నా ఇంకా వినేలా చేస్తుంది.

చంద్రకాంతిలో
చిత్రం : శ్రీవారి శోభనం(1984)
సాహిత్యం : వేటూరి
సంగీతం : రమేష్ నాయుడు
గానం : బాలు

చంద్రకాంతిలో చందనశిల్పం..
చంద్రకాంతిలో చందనశిల్పం..
స్వర,శృతి,లయలా మణిహారం..
గేయమంటి నీ సోయగమంతా కవినై పాడుదునా..
చూపుల చలితో ఊహల ఉలితో చెలి నిను తాకుదునా..
చెలి నిను తాకుదునా..

చంద్రకాంతిలో చందనశిల్పం..
స్వర,శృతి,లయలా మణిహారం..
చంద్రకాంతిలో చందనశిల్పం..

తరగలా నవ్వులా నురగలా మువ్వలా
పరుగుల పల్లవితో ఉరవడి ఊహలతో
రాలకు సైతం రాగం నేర్పే రాయల నాటి తుంగభద్రవో
శ్రీనాధుడికే శృంగారాలను నేర్పిన వాణివి కృష్ణవేణివో
ప్రణయ కవన సుందరీ.. దేశి కవితలో తేనెగ పొంగుదునా
నీ పద లయలో నీ అందియనై పదములు కడుగుదునా..
పదములు కడుగుదునా...

చంద్రకాంతిలో చందనశిల్పం..
స్వర,శృతి,లయలా మణిహారం..
చంద్రకాంతిలో చందనశిల్పం..

వెన్నెలా కుంచెలా.. చీకటీ రేఖలా
పండిన కుంకుమతో పచ్చనిశోభలతో
రాముని పదముల నాదమై ఎగసీ నదిగా మారిన గౌతమివో
తెలుగు పాటకీ తెలుగు మాటకీ వెలుగు చూపినా వంశధారవో
వెలుగునీడలే ఏడురంగులై వేణువులూదుదునా..
పుత్తడి బొమ్మకు పున్నమి రెమ్మకు కౌగిలి పట్టుదునా..
కౌగిలి పట్టుదునా..

చంద్రకాంతిలో చందనశిల్పం..
స్వర,శృతి,లయలా మణిహారం..
చంద్రకాంతిలో చందనశిల్పం..