ఈ బ్రతుకే ఒక ఆట
చిత్రం: ఇద్దరూ అసాధ్యులే (1979)
సంగీతం: సత్యం
గీతరచయిత: ఆచార్య ఆత్రేయ
నేపధ్య గానం: బాలు
పల్లవి:
తల్లొక చోటా
పిల్లొక చోటా
కొమ్మలేదట
గూడూ లేదట
ఏ వేటగాడో
విడదీసినాడటా...
ఈ బ్రతుకే ఒక ఆట
ఇది దేవుడు ఆడే పిల్లాట
మనుషులు, మాకులు
పశువులు, పక్షులు
అన్నీ బొమ్మలటా...
చరణం 1:
చేసిన త్యాగం చెరగని మచ్చై
చెరసాల పాలైనదీ కన్నతల్లి
అమ్మచేతి అన్నానికి వెలియై
అనాధ అయినది ఈ చిట్టితల్లి
చెల్లెలు కానీ చెల్లెలి కోసం
వెల్లువయిందో పాలవెల్లి
విడదీసిన వాడెవడో గానీ
కలిసేదెపుడీ బ్రతుకులు మళ్ళీ
చరణం 2:
నెత్తురుకీ తన నెత్తురు ఏదో
గుర్తేనంటారు
నెత్తిన వ్రాసిన జిలుగు రాతలు
గుర్తించేదెవరు?
పామును, కప్పను
పులినీ, మేకను
ప్రేమ కలుపుతుంది
దేవుని ఆటకు ప్రేమగీతమే
నాంది పలుకుతుంది
చరణం 3:
ఎవరికెవరు చెల్లీ ఈ లోకంలో
ఎవరు నీకు తోడూ ఈ పయనంలో
పసుపుకుంకుమతో
మెట్టినింటికి పంపాలనుకుంటే
మనసులేని ఒక మానవ మృగము
మట్టిని కలిపిందే...
నోరులేని ఈ జీవాలే
నీ బంధువులమ్మా
ఆరని నా కన్నీరే నీకు
తర్పణమమ్మా